তোমাৰ অঞ্চলৰ খোৱা পানীৰ অভাৱৰ কথা জনাই স্থানীয় বাতৰি কাকত "জ্ঞান কুঞ্জ বাতৰি"ৰ বাবে এখন প্রতিবেদন প্রস্তুত কৰা ।
প্ৰতি,
সম্পাদক মহোদয়,
জ্ঞান কুঞ্জ বাতৰি,
গুৱাহাটী, অসম।
বিষয়: অঞ্চলটোৰ তীব্ৰ খোৱা পানীৰ সংকটৰ বিষয়ে চৰকাৰৰ দৃষ্টি আকৰ্ষণ কৰি এক প্ৰতিবেদন।
মহোদয়,
আপোনাৰ বহুল প্ৰচাৰিত বাতৰিকাকতখনৰ জৰিয়তে মই আমাৰ অঞ্চলৰ ৰাইজে দীৰ্ঘদিন ধৰি ভোগ কৰি অহা খোৱা পানীৰ তীব্ৰ সমস্যাৰ বিষয়ে চৰকাৰ তথা জল বোৰ্ডৰ দৃষ্টি আকৰ্ষণ কৰিব বিচাৰিছোঁ। প্ৰতিবেদনখন তলত আগবঢ়োৱা হ’ল:
খোৱা পানীৰ বাবে হাহাকাৰ: জনস্বাস্থ্যৰ প্ৰতি তীব্ৰ ভাবুকি
নিজস্ব প্ৰতিবেদক, গুৱাহাটী:
স্মাৰ্ট চিটীৰ সপোন দেখা গুৱাহাটী মহানগৰীৰ সমীপৱৰ্তী আমাৰ এই অঞ্চলটোত বৰ্তমান খোৱা পানীৰ অভাৱে এক ভয়াবহ ৰূপ ধাৰণ কৰিছে। দীৰ্ঘদিন ধৰি এই সমস্যা সমাধান নোহোৱাৰ ফলত স্থানীয় ৰাইজৰ মাজত তীব্ৰ ক্ষোভৰ সৃষ্টি হৈছে।
সমস্যাৰ মূল কাৰণসমূহ:
ভূ-গৰ্ভস্থ পানীৰ স্তৰ হ্ৰাস: অঞ্চলটোত বৰষুণৰ পৰিমাণ কমি অহাৰ লগে লগে কুঁৱা আৰু টিউবেলৰ পানী শুকাই গৈছে।
পাইপলাইনৰ অভাৱ: চৰকাৰী খোৱা পানী যোগান আঁচনিৰ পাইপলাইন এতিয়ালৈকে আমাৰ অঞ্চলৰ বহুতো ঘৰত সংযোগ হোৱা নাই।
পানীৰ অপচয় আৰু প্ৰদূষণ: যিবোৰ ঠাইত পানী যোগানৰ ব্যৱস্থা আছে, তাতো প্ৰায়ে পাইপ ফাটি পানীৰ অপচয় হোৱা দেখা যায়। তদুপৰি, মুকলি উৎসৰ পানী খোৱাৰ অনুপযোগী হৈ পৰিছে।
ৰাইজৰ দুৰ্দশা:
বৰ্তমান অঞ্চলটোৰ লোকসকলে খোৱা পানীৰ বাবে ব্যক্তিগত পানী বিক্ৰেতাৰ ওপৰত নিৰ্ভৰ কৰিবলগীয়া হৈছে, যিটো দৰিদ্ৰ পৰিয়ালবোৰৰ বাবে অতিশয় খৰচী। বহু সময়ত মানুহে বাধ্য হৈ দূষিত পানী ব্যৱহাৰ কৰিবলগীয়া হোৱাত অঞ্চলটোত পানীৰ দ্বাৰা সংক্ৰমিত ৰোগৰ প্ৰাদুৰ্ভাৱ ঘটাৰ সম্ভাৱনা বৃদ্ধি পাইছে।
চৰকাৰৰ 'জল জীৱন মিছন'ৰ আঁচনিৰ কাম আমাৰ অঞ্চলত কিয় মন্থৰ হৈ আছে, সেইটো এক ডাঙৰ প্ৰশ্ন হৈ পৰিছে। স্থানীয় ৰাইজে এই সন্দৰ্ভত সংশ্লিষ্ট বিভাগক বাৰম্বাৰ আবেদন জনোৱাৰ পিছতো কোনো ফলপ্ৰসূ সঁহাৰি লাভ কৰা নাই।
সেয়েহে, এই প্ৰতিবেদনৰ জৰিয়তে মই চৰকাৰক আহ্বান জনাওঁ যাতে অতি শীঘ্ৰে আমাৰ অঞ্চলত পানী যোগান আঁচনিৰ কাম সম্পূৰ্ণ কৰে আৰু ৰাইজক এই হাহাকাৰ পৰিস্থিতিৰ পৰা পৰিত্ৰাণ দিয়ে।
বিনীত,
পিংকী টেৰণ
জ্ঞান কুঞ্জ টিউচন চেন্টাৰ, গুৱাহাটী
No comments:
Post a Comment